जगदाळे कुटुंबासह खासदार मेधा कुलकर्णी यांनीघेतली एकनाथ शिंदे, चंद्रशेखर बावनकुळे यांची भेट
पुणे: पहलगाम दहशतवादी हल्ल्यातील पीडित जगदाळे कुटुंबातील प्रगती जगदाळे व त्यांची कन्या आसावरी जगदाळे यांच्यासमवेत राज्यसभा खासदार प्रा. डॉ. मेधा कुलकर्णी यांनी मुंबईत राज्याचे उपमुख्यमंत्री एकनाथ शिंदे व महसूलमंत्री चंद्रशेखर बावनकुळे यांची भेट घेऊन आसावरी यांना शासकीय सेवेत समाविष्ट करण्याबाबत सविस्तर चर्चा केली.
एकनाथ शिंदे व चंद्रशेखर बावनकुळे या दोघांनीही या विषयाची संवेदनशीलता लक्षात घेत तात्काळ मुख्यमंत्री कार्यालयातील सचिव श्रीकर परदेशी, गृहनिर्माण विभागाचे अतिरिक्त मुख्य सचिव असीमकुमार गुप्ता यांच्याशी दूरध्वनीवर चर्चा केली. तसेच पुणे महानगरपालिका आयुक्त नवलकिशोर राम यांना शासनाकडे प्रस्ताव सादर करण्याच्या सूचना दिल्या. दोघांनीही या विषयात तत्परतेने लक्ष घालून कार्यवाही करण्याचे निर्देश दिल्याबद्दल जगदाळे कुटुंबीय व मेधा कुलकर्णी यांनी त्यांचे आभार व्यक्त केले.
प्रा. डॉ. मेधा कुलकर्णी म्हणाल्या, “स्वर्गीय संतोष जगदाळे यांच्यावर पहलगाम येथे केवळ हिंदू असल्यामुळे झालेला हल्ला ही अत्यंत वेदनादायी आणि अस्वस्थ करणारी घटना होती. त्या दुःखद प्रसंगी महाराष्ट्रातील अनेक मान्यवर नेत्यांनी आसावरी यांना शासकीय सेवेत संधी देण्याचे आश्वासन दिले होते. या आश्वासनाला दहा महिने उलटल्यानंतर या विषयाची तातडीने दखल घ्यावी यासाठी, माननीय प्रधानमंत्री नरेंद्र मोदी यांना पत्र लिहिले, तसेच गृहमंत्री अमित शाह यांची भेट घेऊन निवेदन दिले होते. त्यानंतर आता या दोन्ही नेत्यांची भेट घेऊन चर्चा केली आहे. या प्रकरणाला आता गती मिळताना दिसत असून, ही दिलासा देणारी बाब आहे.
श्रीमती प्रगती आणि त्यांची कन्या आसावरी यांना दिलेले आश्वासन सरकार लवकरात लवकर पूर्ण करेल, असा मनापासून विश्वास आहे. कारण हा केवळ एका कुटुंबाचा प्रश्न नसून न्याय, संवेदना आणि सामाजिक जबाबदारी यांचा विषय आहे. आसावरी उच्चशिक्षित असून, एमबीए केलेले आहे. त्यामुळे महानगरपालिकेत तिला प्रशासकीय पदावर किंवा वर्ग दोन श्रेणीतील नोकरी मिळावी, यासाठी प्रयत्नशील आहे, असेही प्रा. डॉ. मेधा कुलकर्णी यांनी नमूद केले.
